无意中伫电脑顶发现 分享蜀下

資料來源：【語言藝術與生活智慧】 魏水明編著 台中縣出版

壹、數數歌謠
一、一放雞
（1） 一放雞，二放鴨，三分開，四相疊，五搭胸，六拍手，七紡紗，八摸鼻，九揪耳，十拾起。
（一般唸法）
（2） 一放雞，二放鴨，三分開，四相疊，五搭胸，六拍手，七圍牆，八摸鼻，九揪耳，十拾起。
來啊！來啊！放雞鴨，雞仔、鴨仔走相拍。（簡上仁版）
（3） 一放雞，二放鴨，三分開，四相疊，五搭胸，六拍手，七紡紗，八摸鼻，九咬耳，十拾起。
快樂笑瞇瞇！（（施福珍版）
（4）一、二、三、四、五、六、七、八、九、十。一放雞，二放鴨，三分開，四作堆，五搭胸，六拍手，七圍牆，八摸鼻，九揪耳，十拾起。（陳武雄版）

二、一是當朝一品
一是當朝一品，二是二甲進士，三是三元及第，四是四品京堂，五是五子登科，
六是六國封相，七是七子在朝，八是八婿做官，九是九門提督，十是十全富貴。

三、一本萬利
一本萬利，二人同心，三元及第，四季平安，五穀豐收，

六合同春，七子團圓，八仙過海，九世同居，十全富貴。

四、一去二三里
一去二三里，前村四五家，高樓六七座，八九十枝花。

五、一二三
（1） 一二三、阿婆去洗衫，四五六、阿婆去斗六，七八九、阿婆去海口。（一般唸法）
（2）一二三、穿新衫，四五六、冊愛讀，七八九、毋通吼，歡歡喜喜來學校。（施福珍版）

六、一二三四
（1） 一二三四，囡仔人驚著無代誌，土地公會保庇。（一般唸法）
（2） 一二三四、一二三四，囡仔人驚著無代誌，無代誌啊無代誌，
土地婆會保庇，保庇你細漢好搖飼，保庇你大漢會順適。
一二三四、一二三四，囡仔人褪衫無代誌，無代誌啊無代誌，
土地公會保庇，保庇你細漢好搖飼，保庇你大漢會順適。（簡上仁版）

七、一一一
一一一，樹尾一枝筆。二二二，親家煮雞卵。三三三，脫裘換薄衫。
四四四，功夫茶好味。五五五，三五好嫁囝。六六六，莊火燒厝角。
七七七，落雨上菜市。八八八，窮人啉湆糜。九九九，到老只二口。
十十十，好睏像入木。(廈門)

八、箕螺
一螺學爬爬，二螺走骹皮，三螺無米煮，四螺無飯炊，五螺五挖挖，六螺做乞食，
七螺窮到底，八螺富上天，九螺玉春臼，十螺金瓦厝。(廈門)

九、一是觀音亭
一是觀音亭，二是大路口，三是刣人巷，四是火燒街，五是走馬路，六是草仔垵，
七是水仙宮，八是魚仔市，九是頂沃仔，十是廿四崎。(廈門)

十、炒米香
（1） 一的炒米香，二的炒韭菜，三的沖沖滾，四的炒米粉，五的五將軍，
六的好囝孫，七的分一半，八的緊來看，九的九嬸婆，十的弄大鑼。
打你千，打你萬，打你一千空五萬。（一般唸法）
（2） 一的炒米香，二的炒韭菜，三的沖沖滾，四的炒米粉，五的五將軍，六有六囝孫，七的蚵仔煮麵線，八的講欲分一半，九的九嬸婆，十的弄大鑼。打你千，打你萬，打你一千空五萬，羞羞羞，勿會見笑，攘輸毋甘願，奕輸起痚龜，毋甘願起痚龜，我欲來去投老師，我欲來去投老師，投老師。（簡上仁版）
（3） 一的爆米香，二的炒韭菜，三的沖沖滾，四的炒米粉，五的五將軍，六的好囝孫，七的煮麵線，八的企咧看，九的九嬸婆，十的弄大鑼。（施福珍版）

（4） 一下炒青蔥，二下炒鹹菜，三下沖沖滾，四下炒米粉，五下煮蝦米，
六下煮蚵乾，七下倚咧看，八下咧流瀾，九下九出手，十下分一半。(廈門)
（5） 一的請你蔥，二的請你菜，三的沯沯滾，四的炒米粉，五的五將軍，
六的六仔孫，七的擦枋堵，八的捌恁某，九的狗奴才，十的掠去刣。
（枋堵：木板隔牆）(安溪)

十一、育女歌
（1） 一歲兩歲手裡抱，三歲四歲塗跤趖。五歲六歲漸漸大，有時頭燒佮耳熱，七歲八歲四界走，終日管伊兩支跤，九歲十歲學針黹，驚伊四界去更絲，十一十二著教示，著學禮貌捌事理，十三十四灶頭學，一塊桌面辦得起，十五十六正轉大，毋通綴人去風花，十七十八親來做，心頭歡喜面上驚。（廈門）
（2） 一歲兩歲手底抱，三歲四歲塗跤趖。五歲六歲漸漸大，有時頭燒佮耳熱，七歲八歲真敖吵，一日顧伊兩支腳，九歲十歲教針黹，驚伊四界去更絲，十一十二就打罵，就去予伊學做衫，十三十四學煮菜，一塊桌面辦會來，十五十六欲轉大，驚伊佮人去風花，十七十八做親成，一半歡喜一半驚。（簡上仁版）

十二、育兒歌
一歲二歲手內抱，三歲四歲土腳趖。五歲六歲漸漸大，有時頭燒佮耳熱，七歲八歲去讀冊，九歲十歲知人影，十一、十二、十三佮十四，讀冊、考教中舉人，十五、十六中進士，十七、十八娶新娘。

十三、第一的國公
第一的國公，第二的文王，第三的騎紙馬，第四的死娘奶，第五的弄騰牌，第六的押去刣，第七的走去報，第八的萬刀剉，第九的九嬸婆，第十的打搭鑼。

貳、遊戲歌謠
一、跳索
芎蕉欉，繡球紅，開花二十一，二五六，二五七，二八二九三十一。

二、掩咯雞
（1） 掩咯雞，走白卵，一粒食，一粒吮（tshng2）。咯雞仔囝，宓密密，鳥鼠仔去抓賊。
（一般唸法）
（2） 掩咯雞，走白卵，隨你食，隨你趡（nng3）。咯雞仔囝，覓密密，鳥鼠仔偷作賊。
一支刀咧一支劍，欲走毋走，毋通吼，毋通吼。（簡上仁版）
（3） 掩咯雞，走白卵，隨你食，隨你吮（tsng7）。咯雞仔囝，覓密密，鳥鼠仔偷作賊。
一支刀咧一支劍，欲走毋走，毋通吼，毋通吼。（康軒版）

三、掠指頭仔（匿相揣）
林投、戴斗，目虱家蚤，家蚤無匿（另作無味），老公仔保庇，尪仔頭，嘰啁 (tsih tsiu1)。

四、點水缸（簡上仁版）
（1） 點啊點水缸，啥人放屁爛尻川，點啊點茶鼓，啥人欲娶婦，欲講汝就講，毋講鬥竹管。
（一般唸法）
（2） 點仔點仔點水缸，啥物人放屁爛尻川，點仔點仔點茶甌，啥物人盈暗欲來阮兜，
點仔點仔點茶鼓，啥物人盈暗欲娶婦，點仔點仔點叮噹，啥物人仔盈暗欲嫁尪。×2

點仔點仔點水缸，啥物人放屁爛尻川，點仔點仔點冊包，啥物人盈暗欲來阮兜，
點仔點仔點鉛筆，你若是歹囡仔才做白賊七，點仔點仔點紛紛，你是英雄好漢去做軍。×2
（3） 點主點水缸，啥人放屁爛尻川。點主點茶鼓，啥人今暝欲娶某。
點主點茶杯，啥人今暝來欲杯。(金門)

五、噓吁挨（hi hu e）
（1） 噓吁挨，挨米飼閹雞，閹雞飼大隻；刣予阿舅仔食，阿舅食無了，賰一支雞跤爪，
阿嬤捧去囥，孫仔桌腳蟯蟯鑽。（一般唸法）
（2） 挨啊挨吁吁，刣雞請阿舅，阿舅食無了，賰一支雞跤爪，予嬰仔食無夠，惦在後尾門仔嗎嗎吼。（簡上仁版）
（3） 挨啊挨，載米載粟來飼雞，飼雞欲叫更，飼狗欲吠暝，飼後生欲養爸，飼查某別人的，飼新婦顧搭家，飼老嬤欲煎茶。（金門）
（4） 阿舅來，我毋知，我掠雞來刣；雞小個，我買蝦；蝦小尾，我吹粿；粿無熟，我買獲；獲無爛，我買麵線。麵線長，我買糖；糖烏烏，我買大魚箍；大魚箍堅凍，我縛粽；粽臭角，我掠二隻羊來相觝。(金門；獲即肉)
（5） 咕咕！刣雞請安舅。安舅食袂了，剩一支雞骹爪。阿囝食無夠，坐佇門後咕咕哭。(廈門)

参、生活寫照唸謠
一、啥唸調（http://cuy.ylc.edu.tw/~cuy14/eBook/ch10-7.htm）
我的祖公蹛唐山，過來台灣曝蚵乾。兼佇苗栗賣火炭，才去鶯歌燒碗盤。
上界骨力阮阿祖，透早出門賣搖鼓。中晝轉來曝菜脯，暗時閣賣豬腳魯。
若欲講起阮阿公，細漢就是囝仔王。頭先車腳賣便當，以後四過喝玲瓏。
北港抵著阮阿媽，伊佇麻豆賣柚仔。嘛有在賣米粉炒，一箍伍角食甲飽。
第一好額阮阿伯，日時開店刺皮鞋。瞑時嘛著纏膨紗，有時閣去拾田螺。
大叔佇咧掠水雞，二叔佇咧補雨鞋。三叔拍拼賣古茶，四叔夜市賣鹼糜。
五叔內山做土匪，六叔共人看風水。七叔澎風歕雞歸，尾叔專門在挹肥。
大姑市場在喝魚，二姑後壁做國旗。三姑共人拍鎖匙，四姑廟口賣麻糬。
大舅粗勇做苦力，二舅懶屍愛看戲。阿姨路邊排果子，有時兼做賣飯匙。
阿姆學校賣碗粿，大囝樂隊噴鼓吹。二囝在做番仔火，細囝抵抵做度晬。
世間頭路萬百款，目睭擘金記你選。認真拍拼免祖傳，行行攏會出狀元。

二、人插花
（1） 人插花，伊插草，人抱嬰，伊抱狗，人未嫁，伊先走，人坐轎，伊坐畚斗，人睏紅眠床，
伊睏屎礐仔口。（簡上仁版）
（2） 人插花，你插草，人抱嬰，你抱狗，人坐轎，你坐破畚斗，人睏紅眠床，你睏屎礐仔口。
（施福珍版）
（3） 儂插花，你插草，儂抱嬰，你抱狗，儂未嫁，你先走。儂睏紅眠床，你睏灶跤口；
儂食山珍味，你煮芋仔頭；儂穿紅花衫，你縖奧稻草；儂坐金花轎，你佇得車畚斗。（彰化）
人睏紅眠床，你睏屎礐口，人坐紅頂四轎，你捾包袱仔逮人走。
（4） 人插花，你插草，人抱嬰仔，你抱狗，人未嫁，你先走，人坐轎，你坐畚斗。(廈門)
（8） 人插花，伊插草，人坐轎，伊做斗，人睏紅眠床，伊睏屎礐仔口。(小金門也有此唸謠)
（9） 人插花，汝插草，人刣雞，汝刣狗，人戴新帽，汝戴破畚斗。(大金門)
（10）人插花，汝插草；人刣豬，汝刣狗；人在笑，汝在哭；人睏眠床，汝睏踏斗。(安溪)

二、人生
人講人生七十才開始，八十無稀奇，九十到處滿滿是，一百笑咪咪，六十正是少年時，

五十小孩兒，四十坐佇搖籃內，三十拄出世。（施福珍版）

三、大人
大人比虎較大隻，嘴開親像大尿杓；若有物件到宿舍，較大代誌攏無掠。

四、賣雜細
（1） 玲瓏，玲瓏，玲瓏玲瓏玲瓏，賣搖鼓，賣雜細。玲瓏，玲瓏，玲瓏玲瓏，賣搖鼓，賣雜細。
喊玲瓏，賣雜細，賣搖鼓的由遮過，愛啥物有啥物，遮上濟。大家相招是緊來買，緊來買。
玲瓏瓏玲瓏瓏，賣雜細。賣搖鼓由遮過，看恁欲買啥物貨，欲買啥物貨，唉唷啥物貨。×2
胭脂粉餅粉條佮雪文，手巾臭礬齒膏佮齒粉，欲買緊來趁這陣，讚閣便宜大碗閣滿墘。
玲瓏瓏玲瓏瓏，賣雜細。賣搖鼓由遮過，看恁欲買啥物貨，欲買啥物貨，唉唷啥物貨。×2
玲瓏，玲瓏，玲瓏玲瓏，賣搖鼓，賣雜細。搖玲瓏，賣雜細，賣搖鼓是遮過，愛啥物有啥物，遮上濟。大家相招是緊來買，緊來買。（簡上仁版）
（2） 玲瓏，玲瓏，賣雜細。×2賣搖鼓的由遮過，看恁想欲買啥貨。（施福珍版）

五、賣豆菜
賣豆菜，蔭豆芽，賣潤餅，拖水雞。魚肉鼎，瘦肉炒韭菜花，紅龜發粿，
土地公伯仔欲食著跋杯。

六、愛哭神
（1） 愛哭神，剃頭剃一爿，欠錢無愛還，予虎咬一爿。
（2） 連鞭哭，連鞭笑！後尾門仔一頂轎。×2啊！愛哭神，食飯配土豆仁。（施福珍版）
七、偷食粿
巷仔頭走到巷仔委尾，看到阿妗咧炊粿；欲食毋敢講，假意欲點火，害阮偷拿粿；死人粿、無
命粿，害阮燒著腹肚尾。（金門）
八、教你歌
（1） 教你歌，教你上山挽桃花，桃花開，荖葉肥，紅手巾，白花蕊，花蕊笑微微，龍眼對荔枝，荔枝朱朱紅，子婿騎馬探丈人，丈人無於厝，姨仔放狗咬姊夫，姊夫搖手喝不當，和尚相打扭頭鬃，尼姑抱子出來看人。
（2） 教你歌，教你上山挽蓖麻，挽若濟，挽一飯籬，一旁大姆食，一旁二姆食，大姆生查甫，二姆生查某，坐我的船，打我的鼓，食我的白米飯，配我的鹹魚脯，暗時合我睏，我的婦。
九、矮啊冬瓜
矮啊冬瓜挽菜瓜，菜瓜挽袂著，踏著蕃薯葉，蕃薯青青，掠田蛉，田蛉掠袂著，矮啊冬瓜扛起

一頂大花轎。(蛉ni) (金門)

十、咕咕咕
（1） 咕咕咕，田螺炒豆腐，你厝無米煮，阮厝猶擱有。（施福珍版）
（2） 咕咕咕，田螺炒豆腐，一碗分恁食，阮厝都猶有。(廈門)

十一、羞羞羞
（1） 羞羞羞，捾仔拾魚鰡，一尾煮來食，一尾糊目睭。（一般唸法）
（2） 羞、羞、羞羞羞，提籃仔拾鰗鰡。×2攏總拾偌濟？唉約！攏總拾二尾×2，
一尾煮來食，一尾糊目睭，羞、羞、羞羞羞。（簡上仁版）
（3） 羞，羞，羞羞羞，捾籃拾鰗鰡。×2攏總拾偌濟？唉喲，攏總拾兩尾，一尾煮來食，一尾糊目睭。哼！羞，羞，羞羞羞。（施福珍版）

十二、頭路萬百般
世間頭路萬百般，一行一業那像山：台頂做戲旦，台腳賣碗盤；四界做小工，兼咧做媒人；少年做童乩，食老看佛字；日時踏地理，暝時牽紅姨；樓頂飼粉鳥，樓腳咧跋繳；頭前賣布料，後璧包水餃；若無搰力閣打拚，你著賣某閣賣囝。

十三、雞啼天欲光
雞啼天欲光，賢的媳婦起來煮飯，趕緊煎茶湯，面桶水捧到倚眠床，欲請大家官，起來洗面、梳頭，通食飯。

十四、赤扒扒
赤扒扒，穿紅鞋，上大街，買百貨，有看見天，無看見地。
芎蕉皮，趄一下，哀阿娘，叫老爸。

肆、描寫事物唸謠
一、烏頭仔車
烏頭仔車，車甘蔗，頂頭坐一個憨阿舍；流鼻蚵，掛目鏡，坐袂正；跋落來，唉唉痛。

二、補衫歌
身軀穿，身軀縫，啥人賴我做賊喙生蟲；身軀穿，身軀補，啥人賴我做賊喙艱苦。

三、自動車
自動車，坐阿舍，五分仔車，拖甘蔗。

四、後壁一個鼓
後壁一個鼓，斡頭看恁婦；後壁一欉蔥，斡頭看恁尪。

五、點仔膠
點仔膠，黏著腳，叫阿爸，買豬腳，豬腳箍仔，滾爛爛，飫鬼囡仔流嘴涎。(詞曲/施福珍，廣為流傳，已成為自然童謠) （施福珍版）

六、燒酒
燒酒我咧賣，飲酒我上會，見飲無幾嘴，未飲我先醉。

七、火車
火車欲行東港橋，那行那走那咧叫，一聲垛（短）來，一聲長，真賢搖。搖一下來，搖一下去，嗶噗趒(tio5)。火車欲行西螺橋，那行那走那愛搖，鶯歌若過是板橋，真賢搖。搖一下來，搖一下去，嗶噗趒。

八、龍眼乾
（1） 龍眼乾，三兩半，你點燈，我來看。看啥物，看新娘，新娘媠咚咚，嫁好尪。
（2） 龍眼倌，繡紅鞋；繡未平，銀針交銀線。銀線墜，狗仔吼吼吠，吠叫安排爹來食飯。飯未滾，嬰仔偷挖筍。(廈門)

（3） 龍眼倌，正月半，人點燈，你來看。看啥物，看新娘。新娘高抑低，娶某拜老父，老父無穿襖。娶某拜兄嫂，兄嫂無穿裙，娶某拜龍船，龍船撲撲爬，娶某拜茶鍋，茶鍋沖沖滾，肉炒筍，炒幾塊，炒三塊。一塊請人客，一塊自己食，一塊拈予查某鬼仔食。食麼事？食欲做月內。生啥物？生蛟蜨。抱出來，悾悾跋；抱入去，一粒鹽，一粒米，救袂活；一斗鹽，一斗米，救甲活活活。 (蛟蜨(音chah8)，有作家蠽、家蜨) (廈門)
（4） 龍眼倌，夯雨傘；人點燈，你來看。看啥麼？看新娘。新娘有偌大？無錢想欲娶。娶上廳，看新娘，新娘無穿襖。拜兄嫂，兄嫂無穿裙；拜龍船，龍船噗噗飛；拜茶鍋，茶鍋沖沖滾，一個嬰仔偷挖筍。挖麼事？欲與老嬸婆仔做月內。生啥麼？生蛟蜨。抱出來，悾悾跋；抱入去，救袂活。(廈門)
（5） 龍眼倌，正月半，人點燈，你來看。看啥物，看新娘。新娘高抑低？娶某拜老父，老父無穿襖。娶某拜兄嫂，兄嫂無穿裙，娶某拜龍船，龍船撲撲飛，娶某拜茶鍋，茶鍋沖沖滾，肉炒筍，筍予死查某鬼仔拈一塊。食麼事？食欲做月內，月內生啥物？生蛟蜨；抱出來，抱入去，救袂活；一斗米，一斗粟，救甲活活活。(趙元任記譜)

九、油炸粿
（1） 油炸粿，杏仁茶，看到警察做狗爬，甌仔摃破四五塊，警察掠去警察衙，大人後擺不敢賣。
（2） 油炸粿，杏仁茶，看著警察磕磕爬，碗盤摃破四五個，警察掠去警察衙，雙腳跪齊齊，
大人大人，阮後擺不敢賣。
（3） 油炸粿，杏仁茶，見著警察磕磕爬，碗公弄破四五個，大人掠去警察衙，叫阮雙腳踦齊齊，哎唷喂！大人啊！阮後擺不敢賣！阮後擺不敢賣
（4） 油炸粿，燒甲脆；塗豆仁；規大把。福海宮，煎芋粿；菜市口，蠔仔糜。(廈門)

十、竹仔枝
竹仔枝，連片（phian）起，娶新婦，捌道理。晏晏睏，早早起；落灶跤，洗碗箸；入房間，舉（giah）針黹；呵咾兄，呵咾弟，呵咾親家、親姆爻教示。(平澤丁東，1917：127)

十一、冬粉湯
冬粉湯，米粉炒，芋粿湯，食到飽。

伍、人物寫真唸謠
一、秀才騎馬弄弄來
（1） 阿財，阿財，天頂跋落來，摔一個真厲害；叫醫生趕緊來，目睭痛糊目眉，喙齒痛糊下頦，畚肚痛糊肚臍，嘿！真厲害。（傳統唸謠）

（2） 阿財，阿財，天頂跋落來，有嘴齒，無下頦，有腹肚，無肚臍，叫醫生，叫袂來，叫司公，扛去埋。（傳統唸謠）
（3） 你講奇怪，無奇怪。×2我講奇怪，眞奇怪，請恁大家聽看覓。阿財，阿財，天頂跋落來，摔一下真厲害，真厲害，有目睭，啊呀無目眉，有嘴鬚，啊呀無下頦，有腹肚，啊呀無肚臍，你講奇怪，無奇怪，眞奇怪。（簡上仁版）
（4） 秀才秀才騎馬弄弄來，佇馬頂跋落來，摔一下真厲害。嘴齒疼，糊下頷。目睭疼，糊目眉。腹肚疼，糊肚臍。嘿！真厲害。（簡上仁版）
（5） 秀才秀才騎馬弄弄來，佇馬頂跋落來，跋一下真厲害。嘴齒疼，糊下頷。目睭疼，糊目眉。腹肚疼，糊肚臍。嘿！真厲害。（施福珍版）
（6） 秀才秀才騎馬弄弄來，佇馬頂跋落來，跋一下真厲害。嘴齒疼，糊下頷。目睭疼，糊目眉。腹肚疼，糊肚臍。嘿！真厲害。（康軒版）

二、大頭仔一粒珠
（1） 大頭仔一粒珠，相拍毋認輸，舉竹篙弄金龜，金龜一下飛，大頭仔放風吹，
風吹斷了線，大頭仔傢夥去一半。（一般唸法）
（2） 大頭旺仔伊就一粒珠，相打毋認輸，夯竹篙托金龜，金龜一下飛，哎喲大頭旺仔放風吹，
風吹斷了線，大頭旺仔傢夥，去一半。（簡上仁版）

三、阿草飼粉鳥
阿草阿草飼粉鳥，粉鳥袂飛，換飼雞。雞袂啼，換去種蕃薯。蕃薯袂鬆，換學爆米芳。
米芳定扣扣，爆一下，歸鼎烏烙烙。
四、一個做穡的
一個做穡的，真古錐，驚熱蒙鬃簑，掖籽掖歸堆；種蕃薯，收當歸；插甘蔗，收摃鎚。
做三冬穡，好額到無得落樓梯。

五、一個緣投兄
一個緣投兄，予某撲生驚，正月初一日，透早去拜正，褲穿長短跤，上路侹橫行，人看真好笑，假戇假無聽，丈姆看一見，氣甲袂出聲，食蚶無擘殼，食肉撿硬骿，酒喝一下醉，房間四界拋，好是丈姆厝，無佇食撲骿。

六、小學生
（1） 一年的倥倥，二年的孫悟空，三年的吐劍光，四年的愛膨風，五年的上帝公，六年的閻羅王。
（一般唸法）
（2） 一年仔倥倥，二年仔孫悟空，三年的吐劍光，四年的愛膨風，五年的上帝公，六年的閻羅王。
閻羅王啊囡仔頭王，一年仔驚甲憨憨憨。×2（簡上仁版）
（3） 一年的一年的倥倥倥，二年的孫悟空，三年的三年的吐劍光，四年的愛膨風，
五年的五年的上帝公，六年的閻羅王。（陳武雄版）

八、A B C
A B C狗咬豬，阿公仔坐飛機，摔一下冷支支。叫醫生，來甲伊醫，醫一下跤骨大細支。
（簡上仁版）

九、大頭仔
（1） 一粒星、二粒星，大頭仔拈田蠳；田蠳飛懸懸，大頭仔賣肉丸，肉丸真好吃，大頭仔賣木屐，木屐真歹穿，大頭仔真僥倖。

（2） 大頭仔拈田蠳，田蠳飛甲天頂懸，大頭仔賣肉丸，肉丸毋好吃，大頭仔賣木屐，木屐毋好穿，大頭仔真僥倖。
（3） 大頭仔大頭仔生後生，唱歌欲唱Do Re Mi，肚咧咪肚咧咪，大頭仔賣肉羹，肉羹結歸丸，大頭仔講伊欲賣肉丸，肉丸歹食無人買，大頭仔賣碗粿，碗粿冷吱吱，大頭仔氣著賣花枝，花枝真臭臊，大頭仔換來賣米糕，米糕燒滾滾，大頭仔講伊欲賣米粉，米粉爛爛傷細碗，
大頭仔毋知欲按怎。
（4） Do Re Mi，大頭仔拈田嬰，田蠳天頂高，大頭仔賣肉圓，肉圓苦苦毋好食，大頭仔賣柴屐，柴屐呣好穿，大頭仔真僥倖。

十、十一哥
以前一個十一哥，無某無囝無煩惱：自細就是愛佚陶，透早出門去風騷；
身軀無洗烏蘇蘇，看著袂輸生癩屙；一日到晚流鼻蚵，頭前後壁四界翺；
看著查某烏白褒，真正氣死媒人婆。

十一、拍鐵哥
（1） 拍鐵哥，允銅鑼，丈母厝，好佚陶，恁厝金鉸刀，阮厝金米籮。（一般唸法）
（2） 拍鐵哥，允銅鑼，丈母厝，好佚陶，佚陶厭，提錢買甘蔗，甘蔗園仔芳芳芳，
囝婿騎馬探丈人。×2丈人無佇厝，姨仔呼狗咬姊夫，姊夫叫毋通，無張持，
（3） 後避予狗咬一空，咬甲黑瓏瓏。（簡上仁版）
（4） 撲鐵仔 撲鉸刀，小妹欲嫁乜項無，緊緊寫批交大哥，大哥添粧一甕銀，二哥添粧一甕錢，三哥添粧攆被墘，外公外嬤添粧，一對紅紗燈，點互廳，光纓纓；點互房，光銅銅，點互蠓帳內，照著一個新娘儂。(金門縣 張屏生提供)

十二、枵鬼
枵鬼，枵鬼，食蔗蕊，食甲閣會流鼻水。

十三、囡仔，你幾歲
囡仔！囡仔！你幾歲？新娘車有來過；阿母啊！阿母啊！我不嫁，我要留著嫁皇帝。

十四、猴山仔
猴山仔挽花果，猴仔囝尋櫳無；猴山仔無挽面，猴仔囝一大陣。

十五、阿兵哥
阿兵哥，錢多多，買魚買肉食佚陶，欲娶某，免驚無。

十六、新娘不通哭
新娘不通哭，請你吃中晝，中晝還未煮，請你吃老鼠，老鼠還未來，請你吃旺萊(鳳梨)，旺萊還未買，請你吃甜粿。

十七、新娘
新娘水噹噹，褲底破一孔，頭前開店窗，後壁賣米芳。

十八、乖新婦
雞若啼，天就光，透早起來開廳門，煎一粒卵，煮一個湯，通給大傢倌來食早飯。

十九、好囝兒
大雞公，咯咯啼，做人的囝兒著早起，舉掃帚，掃掃地，提桌布，拭桌椅；
進學堂，勤讀書，敬老尊賢好教示，老爸老母上歡喜，延年益壽食百二。

二十、阿婆
（1） 阿婆婆入來坐，吃粥配田螺，田螺鹹篤篤，阿婆生囝大頭凸；
日本打英國，英國一下輸，大頭仔賣紅龜。
（2） 阿婆來這坐，吃飯配田螺，田螺鹹篤篤，阿婆生囝大頭額（khok）。

二十一、貧惰仙
一天過了又一天，身軀無洗全全鉎，走去溪仔洗三遍，毒死烏魚數萬千。（簡上仁版）

二十三、大箍呆
（1） 暗光師哎喲白目眉，無人請你就家己來。來來大箍呆炒韭菜，燒燒一碗來，冷冷阮無愛。
（施福珍版）
（2） 大箍呆哎喲白目眉，無人請你就家己來。來來大箍呆炒韭菜，燒燒一碗來，冷冷阮無愛。
大箍呆炒韭菜，燒燒一碗來，冷冷阮無愛。大箍呆，到今你才知，到今你才知。
（簡上仁版）

陸、育兒育女唸謠
一、搖啊搖
（1） 搖仔搖，搖仔搖，搖囡仔愛睏愛人搖，搖囡仔，搖囡仔愛睏愛人搖。（聲樂版）
（2） 搖仔搖，搖仔搖，搖到外嬤門前彼條橋，阿嬤共阮疼惜惜，橋下溪水流勿會歇。
搖仔搖，搖仔搖，日頭斜西暗下照，親像阿娘上花轎，頭徐徐仔文文笑。
搖仔搖，搖仔搖，微微的風吹樹葉，阿母細聲輕輕仔叫，叫阮光陰得保惜。（藍淑貞版）
（3） 搖啊！搖啊！搖啊囉搖，搖到內山去挽茄，挽偌濟？
挽到一飯篱，抑好食，抑好賣，抑好予嬰仔做度晬。（簡上仁版）
（4） 嬰仔乖，嬰仔乖，阿公做謎給你猜；嬰仔惜，嬰仔惜，阿嬤做謎給你臆。
你若臆會著，阿公共你惜，阿嬤共你惜。你若臆勿著，憨頭憨腦像大石。（簡上仁版）
（5） 嬰仔嬰嬰搖，搖到三板橋，大麵雙碗燒，大龜軟荍荍，肉圓摻胡椒，豬腳雙邊撩。
嬰仔惜，一暝大一尺。（施福珍版）
（6） 搖呀搖，湊挽茄，挽偌多，挽一飯篱，也有當食，也有當賣，也有當給阮嬰仔做度晬。