最近開始收集詞彙，搵典故出處，再編輯，內容未必百分百準確，歡迎大家探討、更正、補充，集腋成裘。希望最終可以概括所有粵語詞彙，即使係粗口、潮語，都係粵語嘅一部分，唔可以失傳。
開波！

我讀英文嘅時候，粵語背景真係幫我唔少，基本上粵語都可以含括英文嘅發音嘅，譬如話Professional舖啡純奴、Biology敗屙羅吱、Archer阿撦之類，係咪巧叻叻咧！
嚟到【阿嘥文】，同我中學做嘅筆記其實係異曲同工嘅。

【阿四】點解係傭人，以上已經講過喇，你咪以為嗌人【阿四】一定係侮辱人嘅，殊不知你係讚緊人十項全能。
近代，係情場上不得志嘅男人，都會自稱【阿四】，指自己追女仔追到跪地餼豬乸咁，女仔叫佢去東佢唔咁去西。

同【阿生】一樣，係語氣粗痞嘅口語，說話時嘅語氣記得唔好太端正嚹。

而家，【阿頭】已經唔在特指【鬼頭上司】嚹。任何職權係你之上嘅，都可以叫【阿頭】，譬如經理、工頭、大班、開得起玩笑嘅班主任...又譬如我老竇就會叫我阿媽做【阿頭】。


呢個詞有個常用嘅進階，你話完人【阿豬阿狗】之後，覺得唔夠痞，你仲可以鬧佢【豬狗不如】，意思即係比透明人仲要低一級。

粵語入便有好多類近【啊吱啊咗】嘅形容詞，多數係擬境或者擬聲，模仿形容對象講嘢嘅狀態，比如話【依牙松槓】、【雞啄唔斷】、【死唔斷氣】、【鬼食泥】、【也文也武】、【口水多過爹】、【嘻嘻嚡嚡】、【吱吱斟斟】、【吱吱嘖嘖】、【嘰嘰趷趷（齮齮龁龁）】、【吟吟沉沉】等等，通通都係指人多嘢講，好煩咁解。

老一輩嘅人會用得比較多，其實就係愛嚟話人冇腰骨㗎啫。雖然聽落老土，但從字面上睇，呢個詞係古漢語嚟㗎，因為好似普通話咁啊，日常用法上，【憑】已經剔除咗“依靠”之意，只繼續沿用其“依據、根據”嘅意思，就好似，普通話係唔會話：“我憑著墻壁走路”咁喇，就算字典上顯示【憑】指的是依靠，佢哋都唔識點樣運用落一句完整嘅句子度，但係粵語就可以話：“憑埋一便先，後面有車嚟緊。”

同樣，都係接近失傳嘅四字成語，如果想記住呢個詞，你可以想象一下一個人Z型咁係條巷到行，就係所謂嘅【挨街憑巷】啦。

椅係指有【𩩍】嘅座，如果【挨𩩍椅】係等同多此一舉嘅，應該話【挨𩩍凳】先啱。𩩍呢個字係古漢語生僻字，除嶺南語種、閩南語種、福州話之外，其他地方已經冇沿用。唔單止拼音輸入法冇，連新華字典都冇摘錄，詳見《漢語大字典》4412頁喇.......

如果有人成塊藥水膠布咁黐埋嚟，當正你係人肉拐杖，就係【挨身挨勢】喇。

逐隻字解過你知。又【捱更抵夜】咁更新，我真係用心良苦。

【穀種】同【棺材本】咁上下意思，不過照我睇呢，後生細仔講棺材本唔合適。

嗱嗱嗱，好似之前口罩要80蚊一包嘅時候，就係【捱貴米】嘅情況嚹，學以致用。譬如面對壟斷、獨市生意、樓價咁，你都可以講【捱貴米】，只要有得揀，都唔係【捱貴米】所指嘅情況。


點解係驢唔係牛呀？好簡單，因為一對比，牛其實係心甘情願咁為人類服務嘅（所以我唔食牛牛），而驢多數係因為蠢或者單純憨直，加上驢嘅地位通常都好低，農民唔會劏耕牛，又通常唔會太虧待馬匹，驢都幾慘下㗎，於是用驢嚟形容打辛苦工嘅自己就最好不過嚹。

以上講嘅包我補充返，正確商品名叫【枕頭包】，即係未切片嘅方包。而家物價越嚟越高喇，【捱麵包】嘅意思尚存，但係假設你捱緊窮，係理應連麵包都食唔起嘅，兩蚊一拃嘅陽春麵更加適合你。



【捱世界】嘅反義詞係【歎世界】

由小學開始，【捱義氣】嘅事就做唔少，一齊罰企，幫朋友抄作業，一齊出貓，去到中學一齊打交，為咗邊個邊個出頭，又幫邊個問邊個拿電話咁喇。呢啲對你冇咩著數嘅（有著數就叫順水人情），但你又心甘情願做嘅事，就係【捱義氣】。好似周星馳拉梁朝偉報藝員訓練班，梁朝偉就係【捱義氣】咁，因為梁朝偉話過佢根本冇心入娛樂圈。

用粵語表達“叫喚、呼喊”嘅時候，通常會用到【嗌、叫】，按照語言慣性，【嗌】係比【叫】要大聲得多嘅，同樣，係描述事情緩急之分嘅時候，活用兩者，都可以順勢將事件描述得更加細微，譬如遇到火警，【嗌消防】就比【叫消防】聽起嚟更緊迫。又或者，假設你聽到人講“【嗌】我陳仔得㗎嚹！”同“【叫】我陳仔得㗎嚹！”，你就會下意識咁覺得後面嘅陳仔斯文啲。所以，不急不躁嘅情況下，我哋會用【叫】，例如【叫外賣】【叫家長】【入屋要叫人】咁，而【嗌】就會用係【嗌救命】【嗌加油】同以下嘅用語入面：

話說，我細個同細佬俾屋企人恐嚇嘅時候，我細佬都會問我“咩係【拗烏婆（細路仔黐脷根）】呀？”，有段時間答唔出，佢就自己唸埋一便，越唸越驚青，尿都瀨埋。童年冇百度㗎，只可以無限遐想。咁實情，【鴉烏婆】又真係人如其名，係烏鴉精。
佢，散發住腐爛嘅氣息...係夜深人靜嘅時候出沒...會好似麻鷹捉雞仔咁將壞細蚊捉走...（想象）
具體點解廣東人作故仔嚇細蚊，唔作老鼠精，唔作曱甴精，偏偏要作係廣東罕見嘅烏鴉精呢（烏鴉喜乾旱）？可能發明者睇中小朋友會更加驚冇實物嘅嘢啩。
大個之後，【鴉烏婆】就變咗用嚟形容神志失常嘅癲婆呀、恶死睖瞪嘅女人、面目可憎嘅醜八怪之類，任何同我哋童年印象中嘅【鴉烏婆】捫車邊嘅女人。
得意在，【鴉烏婆】同鬼佬嚇細路用嘅【巫婆】，從用法、典故到後來變做形容女性形象嘅變化軌跡，竟然一模一樣...所以，人類嘅歷史總係相通。

【拗痕】有兩重意思，一個係動詞，一個係形容詞，形容遭遇不痛不癢，同【蚊針咁】一樣。

好似我家下咁，查唔到字典認真【拗頭】。
用【拗頭】或【頭痕】嚟形容自己好煩好苦惱呢，實屬廣東人嘅約定俗成，我哋好少會直白咁用呢兩個詞嚟形容自己嘅生理狀態。就好比台灣人常用嘅表達用詞【頭大】，指嘅係佢哋好心煩好為難，而唔可能係話緊佢哋個頭真係好大咁啰。

究竟點區分【詏交】同【嗌交】呢？
如果話，【詏】即係辯，【嗌】即係嘈，咁係咪易分好多呢？再進階啲舉例，如果我話：“我要【詏】贏你”同“我要【嗌】贏你”，咁，前者係講道理、據理力爭嘅嘈交模式，後者則係指冇乜營養，純粹圖個口快嘅口舌之爭。
所以【詏】係粵語入面，係屬於一種battle，諸葛孔明【詏交】好叻，但唔會同人【嗌交】。


【詏頸】同【頂頸、硬頸、死牛一便頸】中嘅【頸】係比喻緊人嘅立場，倘若你企硬你嘅立場，人哋可能會話你份人好硬頸嚹。而【詏】我就解過嚹，即頂撞咁解。所以【頂頸、詏頸】呢個行為，其實即係不斷遊說對方放低立場，認同你咁解。尚且唔算係一個貶義詞。
而引申詞【包詏頸、包頂頸】即係普通話常用口語【槓精】，指嘅係一種會根據對方所言，不斷轉換自身立場，但求可以反駁對方，從而取樂獲勝或激死對方嘅人，所以做人可以【硬頸】可以同人【詏頸詏餐懵】但千奇唔好做【包詏頸】呀。

差啲漏咗

【拗撈】係大部分國家都係犯法嘢嚟㗎，因為承接同所屬公司業務性質相近嘅【拗撈】，好大程度上會影響自己公司嘅競爭力，仲有洩露公司機密嘅可能性。道理大家都明，不過揾食艱難，好多人都揜住良心照做，又有好多好老闆對於自己員工【拗撈】嘅行為隻眼開隻眼閉。


題外話，windows陳皮應用Outlook，曾經一度俾一眾打工仔謔稱為【拗撈】㗎。

香港人慣用詞，即【超重】咁解。香港用【磅】廣東用【斤稱】，雖然重量單位唔同，不過我哋都會用【過磅、磅重】㗎。


舉個例子，街市買餸，我哋會話“唔該稱下條魚呀”，而去到大件物品嘅情況，譬如機場登機口，我哋就會話“行李過咗磅先”咁喇。按照以上嘅語言慣性嚟推敲，唔難解出【輕稱重磅】呢個邏輯嘅。


舉個例喇，我本人就認為美國日日猛咁印銀紙遲早【爆煲】，銀紙變廢紙。又或者學生哥收埋成績單，到家長會嗰日，遲早【爆煲】。


所以【爆煲】指嘅係被動嘅情況，係唔需要任何人去【爆大鑊】㗎。


第二個用法：


如果係想誇張咁表達心情呢，【爆煲】又可以講作【爆廠、爆炸】，【壓力大到爆廠/爆煲/爆炸】係通用㗎。嚴重程度為【爆煲<爆炸<爆廠】三級製。但係由於現代人懶，通常會統稱為【爆】，譬如“難食到爆”，“賤格到爆”，“醒到爆”呢啲【悶到爆】嘅表達方式咁喇....


比起上面嘅【爆煲】同下面會講到嘅【爆廠】，【爆錶】較為新穎，原先係用嚟指超標，譬如血糖【爆錶】咁喇。後期，因為詞語夠形象，所以又被挪用於形容同【爆煲/爆炸/爆廠】相似嘅情況。

我阿爺嘅口頭禪之一，後生仔都恐怕好少用啰。不過就近日關於工廠爆炸嘅新聞嚟睇咧，【爆廠】嘅誇張程度有幾甚，牽連有幾廣咧，相信都唔需要我多解釋嚹。

【爆瘡】講嘅係暗瘡生出嚟嗰陣，而唔係講緊粒瘡爆咗。貌似好多人都誤會咗，啲僆妹仔會話自己生痘痘，然後粒瘡爆咗嘅時候就會話【哎吔我爆瘡呀】咁樣...不過冇所謂啦，未至於話詞不達意嘅。

我就成日【爆粗】嚹，越優秀、歷史越悠長嘅語言就越多粗口，講下啫，只要唔係言出必行嘅話，我覺得講下粗口冇咩所謂喇。（微笑）


【大鑊】係呢度，所講嘅係大件事、驚天大陰謀之類。


今時今日，講起【爆燈】，啲人會下意識咁問“咦？你都有睇非誠勿擾㗎？！”...此【爆燈】非彼【爆燈】呀吓，我哋講【爆燈】係用於對人盛讚，係粵語入面係少有嘅純種褒義詞嚟㗎。譬如有人讚你【型到爆燈呀你今日！】咁就代表呢個人係真心真意咁讚你，唔係講緊客套說話。


點解有啲綜藝節目咁難睇咧？多數都係因為佢哋太跟劇本，睇返90年代，【爆肚】盛行嘅年代，即使係小地方嘅頒獎典禮都特別好睇㗎，【爆肚】等同創意，係才華洋溢嘅表現。

網上有人話【爆馬欄】係上春樓咁解，錯㗎！邊有你哋唸得咁邪惡！（講笑）其實就係同異性或者同性去開房咁解，冇特指任何職業。

【爆房】同【爆馬欄】，兩者之間嘅分別，其實就淨係得年代之分㗎啫。印象中千禧年前後【爆馬欄】仲係主流講法，換言之即係七、八十後嘅主流講法。之後嘅世代，就主要講【爆房】或者斯文啲多講【開房】。




原因可能係佈局似馬欄嘅長方形建築越嚟越少喇...何為馬欄型建築咧？我畫幅畫過你睇：

好似TVB神劇《難兄難弟》入面謝源一家嘅屋企就係咁嘅馬欄戶型。
通常咁間隔嘅戶型，都係一樓一戶或者樓宇座地面積好大先可以做到，大酒店都仲係咁設計嘅，不過價格實惠嘅時鐘酒店，而家普遍都係單邊房㗎嚹。
其次，有可能係獨生子女多咗，屋企人唔係屋企嘅機會多咗，亦有可能係因為而家後生仔零用錢多咗等等等等，簡陋屈仄嘅【馬欄】已經滿足唔到佢哋嚹。

又见到有人乱噏廿四，话【爆缸】即系【爆肛/**花】咁解，我求求你哋唔好再污名化粤语好吗？！

我同朋友中意讲笑，叫【爆谷】做【爆谷花】牛油爆谷花最正





普通话嘅书写系【暴甲】...我就思疑佢哋系咪用错字咧？定抑或佢哋嘅【暴甲】系【暴力装甲】之类嘅缩写咧？以后再探讨...

我自己比較偏向【呔】呢個字，點解呢，因為【胎taai1/toi1】係雙音字，係冇注音嘅情況下好容易有歧義。好比，有啲地方口音會讀lun4 toi1，聽落好似冇錯，但如果你再用相同發音讀車胎toi1，咁即刻你就可以發現呢個讀法係有問題嘅。畢竟【呔/胎】係進口詞彙，由英文Tyre音譯出嚟嘅，咁就可以推敲出，【呔】嘅正確粵語讀音係taai1，而普通話先至係用胎呢個字嘅。



【爆響口】同【爆大鑊】對比一下，可以咁理解，【爆響口】=告密，【爆大鑊】=令到秘密被發現，留意嚹，【爆響口】特指嘅係用語言將秘密講出去，後者並冇指明方式為何。
聽起身，【爆響口】似乎更加鬼鼠陰濕，理虧一啲，而【爆大鑊】則冇太明顯嘅性質定義。
舉例子，當你用其他人嘅秘密勒索恐嚇人嘅時候，你通常會話：“你再唔出現我爆你大鑊㗎！”而非【爆響口】；當你警告人唔好亂講嘢嘅時候，如果話：“你知如果你爆響口個話，會有咩後果㗎喇？”就同整個語境更加貼切嚹。


【爆陰毒】呢個詞好奇妙，聽落出乎意料地有霸氣，夠鏗鏘，絲毫唔覺得係同陰謀詭計有關嘅。而當中嘅【爆】，絕大程度上都係為咗俾控訴方宣洩情緒㗎啫，因為【爆陰毒】係幾乎唔可以用係自己身上㗎，主要用於控訴，責罵他人。畢竟好似“嘻嘻嘻，我陣間爆你陰毒㗎...”咁嘅句子係好離譜嘅，唔合邏輯。
咁或者你會問我，咩係【爆陰毒】行為呢？咁我求其整理咗幾種：
【㧻魁】【擺上檯】【報竄】【執雞】【偷步】【扮豬食老虎】【反骨】【搞鬼】【食夾棍】等等。



口講下，拋下人浪頭就算嚹各位，唔好實踐！做個唔鼓吹暴力嘅廣東人（微笑）

粵語諺語中，除咗以形象化嘅方式表達抽象涵義外，亦時常借用生活常見物造語，譬如講究飲食嘅廣東人，【煲】係我哋嘅語言入面舉足輕重，【煲】可以解作【鍋】，但【鍋】一般指圓柱形，即直身、闊口、平底的烹煮工具，而【煲】是璧深而陡，平底的烹煮工具。
廣東人嘅粥，唔同於其他地區常見嘅【稀飯】或【湯飯】，佢哋水米分離，而我哋嘅粥就如清代袁枚嘅《隨園食單》：“見水不見米非粥也，見米不見水亦非粥也，必使米水融合，柔膩如一，而後謂之粥”話齋，係必費長時間熬製出嚟嘅，狀似漿糊嘅，先有資格叫粥。
所以【煲】係粵語入邊，就引申咗【費事費力】嘅涵義以及將必備之物比喻成【煲】嘅熟語（約定俗成、與時俱進嘅口語系統）模式。
我前世做錯咩事點解屏幕會有舊[關閉]黐係度...如影隨形喎真係..吓？

我自己就係好中意【煲醋】嘅，我中意收藏啲手工藝品呀，貼紙呀咁，畫畫用嘅顏料都按斤稱嘅。所以你可以咁理解：屋企係【煲】，入面嘅食材就係你嘅收藏品嚹~

我可以一日煲四季《老友記》，每年【翻煲】一次。
呢個係俾《藍色生死戀》呀，《大長今》《天國的階梯》等等帶出嘅詞語，當時嘅男人用嚟揶揄自己老婆、女朋友煲韓劇（唔煲湯）。


【煲老藕】係民國前後出現嘅詞彙嚹，而【煲老茄】則係近十幾年先出現嘅。
原因大概係，舊時代女性地位低下，【煲老茄】係平常事，冇咩好講，但相反地，【煲老藕】就好出奇嚹，旁人百思不得其解，自然就造語揶揄，所以各位姐姐仔唔好覺得冒犯呀！



其實唔單止娛樂新聞會成日用【煲水新聞】掩人耳目嘅，好似Facebook CEO朱伯克早前因為盜取用戶私隱被網絡公審期間，佢就曾經嘗試漏出自己婚變嘅消息，欲蓋彌彰咁喇。


上乘嘅【煲仔飯】要有鑊燶，飯要粒粒分明有咬口，豉油要拿糖爆過，配上一煲瓦煲枸杞葉豬潤湯下火。
人哋笑【煲仔飯】個名太瘋癲，我笑他人看不穿。試問世間上又有咩飯可以好味得過煲仔飯呢？而且作為一餐有餸飯，搭埋湯加多隻鹹蛋，都只不過係廿五蚊。
唔好顧住食呀，得閒無事考究下佢嘅出處，你就會發現原來【煲仔飯】簡直係中國飲食史上嘅里程碑嚟㗎！深受廣東人歡迎嘅【煲仔飯】，就咁流傳至有電飯煲嘅年代嚹，地位依然屹立不倒㗎，如果你問人：“喂，陣間去食碟頭飯定煲仔飯呀？”倘若佢識食，佢一定揀【煲仔飯】喇。數碼煲仔飯呢啲流嘢就另當別論嚹。

【扮嘢】

【扮叉燒】

倘若要係粵語入面搵出同近年常用嘅普通話粗口【裝逼】最近義嘅詞，就非【扮叉燒】莫屬啦。如果你有深究過【裝逼】同【扮嘢】兩個詞，你或者都會知道其實兩者係有區別嘅。
【裝逼】係粗口，係鬧人嘅；【扮嘢】同時具備中性同貶義兩種性質。
譬如有人扮劉德華好似，你可以讚佢【扮嘢】好叻，係【扮嘢王中王】，有人扮曬自己係龍頭大佬嘅時候，你又可以鬧佢好【扮嘢】，而你搞笑之後，你又可以話自己【冇...我都係扮下嘢啫...】，用途咁廣泛，全因【扮嘢】一詞係冇絕對定義嘅，【扮靚、扮蟹、扮cool、扮有型、扮情聖、扮純情、扮四條、扮叉燒、扮死狗、扮上菜、扮豬食老虎】扮乜扮物通通都可以歸納入【扮嘢】度，一句話搞掂，聽嘅人都會即刻明白你嘅意思。


而【扮叉燒】，雖然唔係粗口，但佢同普通話【裝逼】係最接近嘅，都係指用【扮嘢】嚟抬高自己。
實例，如果人哋詐窮問你借錢，你唔可以話佢【扮叉燒】，啲高分低能扮自己冇溫書，結果考得好好嘅時候，你同樣唔可以話佢【扮叉燒】。相反，如果有人孭住個假LV，同你講佢係李嘉誠嘅四姨太，又或者，有個人話佢識得慈雲山陳浩南，拋你浪頭，咁你先可以鬧佢【扮叉燒】。


【扮靚】

【扮懵】

【扮上菜】

好多人，會亂用【扮上菜】呢個詞嚟亂鬧唔肯屈就、下嫁或者單純熱愛單身嘅女人。
留意嚹，【扮上菜】係好具備攻擊性嘅斥責詞，佢特指嘅係一啲試圖將自己打造成有家世、有才藝、有學問、有內涵、有德行，抬高自身價值，捏造一幅木門對木門嘅景象，從而嫁入豪門或者釣金龜婿嘅女人。
簡單啲嚟講，【扮上菜】嘅女人係訛緊啲信以為真嘅男人。
所以如果個女仔一冇欺騙，二無圖謀，只不過係唔中意你，咁你就唔可以話人【扮上菜】嚹。
講起個典故，從前媒人嘅職業規範，係包括查家宅㗎，係配對男女前，要先將雙方嘅情況如實稟報，當然，佢哋會酌量講多幾句好話或者少講幾句壞話，但係僅限於修飾用詞，避重就輕，譬如待嫁女子肥嘅話，媒人通常會用【好生養】嚟代替，男嘅窮，媒人就會話男人【擔屎唔偷食】，但媒人係唔可以講大話嘅，因為係古代，如果男女成婚後，發覺對方貨不對板，按照當其時嘅法例，係可以將媒人告上官府嘅。
置於【下欄扮上菜】嘅由來，就係當眉精眼企嘅媒人，係查女方家宅嘅時候察覺女子作大，村姑扮仙姑，想連媒人都訛埋，咁媒人就會斥責佢【下欄扮上菜】嚹。


【扮死狗】

【扮四條】

【扮蟹】

好多人錯將【扮蟹】當成【扮嘢】咁用，其實【扮嘢】可以係【扮蟹】，但【扮蟹】唔一定係【扮嘢】㗎。
【扮蟹】通常用於話人故作另類、搞特殊。
舉個例喇，假設成班朋友係大排檔食飯，
朋友A話“唔...我唔碳水化合物㗎...”【扮蟹√】；
朋友B話“啊...你哋睇...今晚嘅夜色真係月明千里呀.....”【扮嘢√】；
朋友C話“最近天氣熱到咧...我尋晚訓街邊，涼爽過空調！”【扮蟹√】；
朋友D話“呢度啲乾炒牛河邊度有我平時去開嘅希爾頓大酒店炒嘅好味呀！”【扮叉燒√】；
此時，朋友E默默咁係個書包度，拿咗個煙斗出嚟食【扮蟹√】；


【扮豬食老虎】

以上三個詞語大致上嘅意思都係一樣㗎。如果將佢哋用粗痞程度排比，咁順序就應該係：
【搬屋】<【搬扯】<【搬竇】咁樣。
粵語用字從來考究，【家】咧，一般唔會用嚟指【屋企】㗎，屋就係屋，係死物，而【家】指係嘅【家庭、屋企人】，或者其他團體譬如【大家】咁，如果你問我咁【家具】又點計先？粵語通常稱【家具】為【傢私】，即係家庭嘅私產，係精簡詞嚟，所以總括嚟講【家】同【屋】係兩回事。

呢個詞經常被用於揶揄政客，又可以話人“只許州官放火，不準百姓點燈”，即係指人雙重標準，矛拉（無賴），一時呢樣一時嗰樣。譬如，小明同陳仔玩遊戲，包剪揼，第一鋪陳仔用包贏咗小明嘅揼，第二鋪輪到小明用包贏返陳仔嘅揼嘅時候，陳仔賴貓話：“我出嘅係火屎嚟㗎，唔係揼！係呢個遊戲嘅絕招，除咗我冇人出到嘅！可以燒爛你塊布嘅！”咁...就係最直白嘅【搬龍門】解釋嚹。


明明係超有水準嘅成語，點解冇乜人用呢？




比喻【少/細】嘅時候，廣東人通常仲會講【豆膶咁細、攝牙罅、丁屎咁多多（口語讀Dur-Dur）、啲咁大（口語daai1）】，好多都唔記得咗【鼻屎毛】嘅存在嚹。其實都幾形象幾詼諧呀，不妨多用。

【白烚】

【白𠽌𠽌】

值得一提嘅係【𠽌】係粵語專有嘅字，係完全冇普通話發音㗎，字典標註嘅發音通通都係粵語音標，譬如xud、syut咁，所以估計，應該係清朝政府造語時，就已經將呢個字捨棄咗，冇打算再用嚕...好彩，仲有我哋堅持用，畢竟字呢家嘢，粒粒皆瑰寶呀。
有時我都反省自己，如果粵語想拉闊使用人口，咁首要嘅，肯定就係唔排外！打個比喻喇，我接觸過嘅日文母語群體同英文母語群體入面，佢哋都完全唔會介意人哋嘅口音、語法唔鹹唔淡㗎，反而仲好鼓勵其他人多講，好樂意賜教，咁我呢方面就可以好放膽咁講，日子有功自然就學識比較地道嘅英文（我唔識日文）喇。
我眼見好多人都有心學粵語㗎，但係礙於怕俾人笑，最後都係半途而廢，識聽唔識講，咁樣嘅結果，對我哋粵語群體嚟講係一啲好處都冇㗎，作繭自縛，文化人嘅雙眼係雪亮嘅，粵語有幾好玩，其實唔需要我哋多解釋，幫助佢哋搵到學習嘅樂趣，佢哋自己就會繼續學㗎喇~
（如果想學粵語，我唔介意你你哋加我v，我得閒就會回復，咸濕佬免問，我會報差佬㗎吓）


【白撞】

【白撞】同【運桔】又有唔同噃，唔好撈亂呀，首先，【白撞】係犯法嘢，【運桔】唔係。


【白做】

【擺明】

【擺檔】

【擺酒】

【擺款】

【擺闊佬】

【擺上檯】


有啲人誤以為【擺上檯】係【擺上臺（我所講嘅有啲人包括搜狗拼音）】
注意，係檯面嘅檯，唔係舞臺嘅臺，成個比喻同舞臺一啲關係都冇㗎。

【摆乌龙】

【摆乌龙】同【䅺青】均与广东民间喜好信奉参拜丰收神明嘅习俗、信仰有关。譬如广州同佛山，仲会扒龙舟，广东地区每年都会落一次龙舟水（神龙降恩泽之意），我哋又有五羊授穗於民咁嘅代代相传嘅传说等等。


母庸质疑嘅系，好多人普遍迷思点解广东人/福建人咁迷信呢（百度查“广东信仰”，就会有一大堆不堪入目嘅斥责）？冇错，系“封建迷信”嘅迷信。我当然反对喇。
南北两地对宗教持两种意见系因为我哋受到“xx熏陶”嘅程度唔同，大家都知道喇，中国有段时间文化大洗版，好多原本好正常嘅事，都被讲成系大不敬呀...或者系封建，拖大家后腿嘅事，甚至连紫禁城都改名成咗故宫。咁究竟系咪呢？认为迷信会招惹恶果呢种谂法本身，系咪又系另外一种迷信呢？就见仁见智啰讲真。
我唔认为信仰绝对唔系坏事，信因果报应只会令人向善，忌讳作恶多端，信亲人死后会去更好嘅地方，譬如天堂咁，系对生者嘅安慰，好似广东人忌讳口业，新年流流唔讲“死”唔讲粗口，其实只不过系自律或者对自己进行心理暗示啫，拜神唔代表我哋只迷信唔努力，只不过系想事情如虎添翼，咁又何来迷信之有呢？
我偏唔信，话南方人封建迷信嘅人，系亲人仙逝后，会完全当亲人嘅尸骨系死物咁，会唔设灵，会扻烂个骨灰龛当垃圾咁揼落街啰...真系讲都冇人信啰...**咩


【报窜】

【报串】系错误写法，【窜】同【串】虽然同音，但意思风马牛不相及。


【报大数】

【报细数】

【鲍鱼刷】

湛江人速速前来认领你哋嘅伟大发明~


【本迤】

为咗搵到【本pea】同【hea】嘅正字，我真系花咗唔少心神，好彩皇天不负有心人，最终都俾我搵到。字典中【迤】嘅注译，同粤语常用字pea系唔关联嘅，【迤】系爱嚟形容风景嘅...具体点解有资料证实【本pea】嘅正字系【迤】呢？我拗爆头都唔明...哈哈...你哋帮帮手谂下喇不如？


【弊家伙】

我细个斋听以为呢个词嘅字系【闭家火】，我心谂，系喎...屋企冇火煮饭真系好弊喎...我细细个已经展现异於常人嘅语言分析力，有冇？


【标靶药】

【标蔘】

【蔘】系古汉字嚟，后来现代造语就将佢同参加嘅【参】合并咗，为咗双音字造成歧义，我哋都系用返【标蔘】喇（不过拼音输入法打唔出）。


【标尿】


粤语中，如果要表达病理性或者忍唔住嘅排尿现象，我哋会讲【濑尿】【失禁】【屙湿】之类嘅，【标尿】通常系用嚟讲下笑，作大咁㗎啫。
譬如，如果我话：“我笑到【濑尿】”，旁人听到有可能会当真，会买条裤畀我...但如果我用【标尿】，听到嘅人就会会心微笑。
所以，如果遇到好恐怖嘅情况，就会用【濑尿】嚟形容，因为真系有可能会发生啲咁不幸嘅情况，好似小朋友咁，就真系有机会吓到濑。