为方便外口个读者阅读，兹篇文章除了置个“个”字转成“的”字外，捌个拢总使用纯正潮语字，并伫括号内底注音。

————————————————————————————————————————

三月的海风，犹再些许微凉起来，吹着予(haiN)人感觉酷(hog)爽快。我坐伫(do)驳岸边，睇着海涌(êng)佮沙埔拍到上齐匀。大概伫五百公尺远的所在，我睇见阿嫲的形影。自从阿公过身了后，我惦是感觉阿嫲的形影加了一分孤单佮寂寞。虽然伊的目睭睇起来犹原雅雅，但是眼神已经无有早前的热情，目睭亲像是一口焦涸涸的古井，对井口睇落去，深到予人睇毋着底，无法术估臆(io)伊的深度。我哋块知影？伫上深的所在有伊佮阿公的过去！

阿嫲行到我身爿顺势坐落来，我猛猛去扶伊双手。

阿嫲掼(guaN)着伊正煮好囥(keng)入伫糜(muê)篮内底的饭菜乞我，我睇着伫海墘彳(têg)亍(to)的孥仔，感觉家(ga)己亦(ia)返去到孥仔时代彼(hi)种无烦(huam)无恼(lo)的生活。

「早前汝上羡(ngiang)唤(ham)阿公揣(cua)汝去海墘，我原哙记得汝上羡置撮涂沙挲做细粒的丸仔，还嚷阿公欲挈(kio)返来煮，挝(zua)挝拢是我去叫恁返来食饭。兹(zi)下汝大个矣(ao)，亦较哙晓想，无跟(ting)呾细阵(diang)时遐(hian)韧(run)性矣。」

阿嫲伊人无读过偌(rio)多(zoi)书册，所以亦毋晓用「人事已非」来形容，但是我知见兹是阿嫲想阿公的方式，伊惦是轻声轻说地诐(puê)起早前发生的物件，恰似(siao)是别人伫彼块讲故事平样。虽然伊目睭瞌瞌，但是我犹原睇着悲伤，感觉着孤单。

我惦惦伫想：阿嫲是毋是无想欲流目汁，所以伊选择置目睭瞌起来，置目汁关紧伫彼口睇毋着底的古井内。有偌多过我艰苦到一句话拢呾毋出嘴，我就愕(ngo)愕坐缀(duê)细听伊人呾话。

海涌犹原跟沙埔拍到上齐匀，恰似有真多话想欲佮海墘呾，所以一直发出「哗啦啦」的声音，亲像阿嫲有真多对阿公的思念平样；亦可能是因为今仔日是阿公忌辰的关系！

「汝原哙记得阿公送乞汝的彼条项(am)链无？」

「定着喏(no)！」我句物讲(gong)到真轻松。

「恁阿公惦惦伫呾，全内撮孙仔拢无，是呾因为伊上惜汝，所以哩暗静暗静买一条攽汝！」

我摸着项链，阿嫲续(sua)落去呾：「我佮恁阿公去拍金铺阵(diang)时，一睇见彼条项链，阮便知影汝哙心适。恰 恰汝相兔，所以就买落来送乞汝做生辰礼物。我犹原记得汝睇着彼条项链跳天嚷地的样相，想毋到尾尾汝煞(sua) 欢喜到哭出来……」