JAS GUL LOS~甲古老

Jas Gul Los——甲古老

Jas gul los nins max doud mib,jongs gint blab soub jongs gint blab hlot shax zhaos wud nhob gus jul,nhol dongt deb janx zhaot keut bol。

Wud nangd npad nbut ‘’ Lis Feib Niangb ‘’,qiub xenb bub reut yeab deit chud Jas Gul Los wud nang npad。Wud jos git dead qeub xenb bub dob yeab deit jex guib Jas Gul Los。

Max eib Jas Gul Los xangx mongl nhob jib enb ad leb ghab bol jib doul mex heub yaot ghunb ,mex heub yaot ghoul。

Nex nieab ghot ghab bol jib doul shax mex ghab dex nteax ad ,nangx moux nhol daot dand?

Jas Gul Los nieab,En !‘’ wel deit lies nhaob ‘’。

Nieab Jas Gul Los nhaob gus ad ded jongs gint blab soub jongs gint blab hlaot ,jid longs yeab yob ndangt jul jongs ded yeab deit jex nteax,jib ghuat chud nangx sanb。

Mex ad hneb Jas Gul Los gheax bax xiand gol hex mongl yeut zal ,pongb cangt Penx Zout 。

Penx Zout nieab deb nab moux heut wel tiat ngongl xaot。
Ab yix … !Jas Gul Los nes Penx Zout ‘’moux hnant wel chud deb nab ,nangd moux mex heut hliob ghab jut‘’?
Penx Zout nieab : ‘’wel yib beat jut ",Jas Gul Las nieab :‘’nangd moux yib beax jut, mou shax jex jas wel ad leb lenx toux‘’?wel heut moux tiax xaot?

Las Gul Los deub geud wud nangd ad ded blad soub blad hlot jid jeus lies beut Penx Zout,Penx Zout deub neis wud nangd jul 。

Penx Zout nzhad mongl jib chat bod wud nangd mil ,wud nangd nes wud nieab nins jid leb?wud nieab nins Jas Gul Los 。

Penx Zout nangd mil nieab :‘’Nangx dand hneb noux bod wu lol ghud wel,hnant wud lol ghud wel ,wel mex dut aot wud pud,Penx Zout wud nieab hol。

Dand hneb Poub Zout yeab mongl yox zal pengb cangt Jas Gul Los nieab : boub mad hnant moux mongl ghud boub mongl 。

Js Gul Los deub mongl ghud wu,ghud dand wu bloud。Penx Zout nex mad geub wud ad pangb mes yeax jangb deus xis deus nzhead ,mlenx had hongn had hongb,wud zangs cid nieab ghot toud dead 。

Jas Gus Los nes wud nieab : mlex ghot ad ,moux ghot dead nangd moux mex heut hlob ghab jut ?

Penx Zout nsngd mil nieab:‘’ wel yeax nongb jus ,jex nianl mex houb yaot hliob ghob jut jul。Wel nax janb daot max eib Jas Gul Los nex mil nins wel heut chud geud shout ,Jas Gul Los nins wel heut jant deal deb,max eib ndut hneb ndut hlat nins wel jangs "。

Jas Gul Los nieab:‘’ Nangb nangx ndut hneb ndut hlat nins moux jangs, wel deub lies mongl ceut jid dex‘’。

Poub Zout nex mil yeab nieab: ‘’ wel yeax janb jex daot ghab jut diol,deb nab moux jongt ad,wel yeax janb janb dongb dongb‘’ ,deit mlex mongb ad ad ongl ongl 。

Jas Gul Lot nieab wel yeax shangb wud dangd dangl yad,nieab wel deub yax nins wud heut giant tead。

Jas Gul Los wud xangx xangx banx jex tongd ,‘’Penx Zout nex mil nieab ndut hneb ndut hlat nins moux jangs gangs wel mongl nceut‘’。

Jad Gul Los njeut gheax ghed hlat leut gheul mongl nceut ghed hlat nangd ad zhaos ndut dox 。nceut lies dex lies dex yeab blul hneb jul ,wud yeab nzhangl lol。

Xib deax wud yeab mongl nceut,ghab ndut yeab zhangl jid shanb jul 。Wud yeab nceut , nceut lies dex lies dex yeab blul hneb jul ,wud yeab nzhangl lol。

Loux bub hneb wud deub geub hliet jib choud mongl nceut ,mongl dand ghab ndut yeab zhangl jib shanb jul 。wud yeab yob nceut, lies dex lies dex yeab blul hneb jul。

Bub hneb yeax nins nangb nangx ceut jex dex,wud nieab "peis qiub" teat hmangt jex nzhad mongl,wud lies nkhed ghab ndut geub jib zhangl jib shanb,wud deub beut nib leb ghab lab ndut dox zhol。

Beut dand xib deax ,ghab ndut geub wud zhangl jib shanb nib leb zhal zhal ndut dox zhol。

Geub zheit wud nangd npad deub heut Jas Gul Los mongl gut ndeud ,gut dand Ghab Ned Nianx Wangl mongl。

Eid yi…… ‘’ Nianx Wangl ‘’ wel jad mil yol ,ghab Nes Nianx Wangl nieab nins chud nangb jul?

Jas Gul Los nangd npad nieab wel qeub xenb bub dol yeab deit chud Jas Gus Los nangd npad 。

Jad Gus Los deax daol yeab deit nins ad ngongl nangb nangx ,jex ghot yeab jex rangt yeab jex das les!moux heut wel geul bul 。

Ghab Nes Nianx Wangb fand benx ndeud jex ghans,dad nend fand dad dox fand jex ghans ,jex ghans mex Jas Gul Los nangd leb nbut。

Od wud !leb nbut nchad nib ……geub chud ghab hleat benx nbeud giax mil yad,ghans yad ghans yad!

Boub heut wud nangd nbut geub fand jid bul 、geub bul、geub bul wud nib dand oub wanb jongs qiand jut。

Zhax dox Jas Gul Los deub chend xand mongl。




楼主 如洋洋  发布于 2019-03-04 00:07:00 +0800 CST  
对的

楼主 如洋洋  发布于 2019-03-04 07:35:00 +0800 CST  
这故事,和我们同族的汉人也有,他们有彭祖,少了甲古老不齐全。

楼主 如洋洋  发布于 2019-05-29 12:47:00 +0800 CST  

楼主:如洋洋

字数:4209

发表时间:2019-03-04 08:07:00 +0800 CST

更新时间:2021-01-10 13:27:49 +0800 CST

评论数:10条评论

帖子来源:百度贴吧  访问原帖

 

热门帖子

随机列表

大家在看