廣東話係唔係「法定語言」，就唔方便喺度討論喇！但你問小編撐唔撐「廣東話」，就等我用行動力撐啦！我哋香港人生活喺香港，當然係用廣東話，但原來廣東話除咗用嚟溝通之外，佢仲係一種好好用嘅設計元素嚟！就好似Mia同佢男友Jude一齊搞嘅Fairy Floss workshop咁，自家嘅設計玩盡香港特色，「廣東話精品」絕對觸動到唔少香港人嘅神經！
楼主
皇帝夢 发布于
2016-06-22 11:35:00 +0800 CST
但作為一個產品設計師，起初又點會諗得到用「廣東話」作為設計元素呢？Mia：「廣東話係我哋香港人生活嘅語言，但佢又同標準嘅廣州話唔同，因為廣東話已經夾雜咗好多香港潮流、文化喺入面，繼而不斷有新式嘅香港人先會用到嘅詞彙出嚟，所以廣東話有好大嘅擴充性同玩味喺度。而我哋將廣東話同產品融合，就係想透過產品令更多人知道廣東話有趣嘅地方，尤其係外國人。」
楼主
皇帝夢 发布于
2016-06-22 11:36:00 +0800 CST
Fairy Floss workshop嘅廣東話精品其實有好多樣，而喺Mia口中，最渴市嘅就係環保袋，「咁一嚟而家用膠袋要畀錢啦，二嚟環保袋嘅用途都真係好闊，亦都mass得到唔同嘅群眾，加上有一啲好得意嘅廣東話字眼印喺上高，所以本土嘅香港人、遊客，都有唔少會畀錢支持。」
楼主
皇帝夢 发布于
2016-06-22 11:38:00 +0800 CST
Mia嘅廣東話精品就係寄賣喺PMQ嘅「香港‧設計廊」入面，除咗之前講嘅環保袋之外，喺呢度仲會見到有廣東字嘅杯例如飲晒佢、暖笠笠，除此之外，仲會見到印有經典歌詞嘅遮喺度，就連學友嘅「分手總要在雨天」都搵到講明先，Mia係拎好晒license先印出嚟賣嘅，梗係支持正版啦！
楼主
皇帝夢 发布于
2016-06-22 11:39:00 +0800 CST
Mia：「印呢啲廣東歌遮，最難都係license，因為有啲歌，好似學友隻 -分手總要在雨天咁，太舊，要搵番版權公司都用咗唔少時間，同埋出嘅歌詞、印遮嘅數量都有限制，變相每一把嘅成本都好高。但奇怪嘅係，買呢啲遮嘅人，尤其係學友歌，都係內地人多，仲要係唔少都係後生仔女，而家香港後生一輩都可能聽張學友！」
楼主
皇帝夢 发布于
2016-06-22 11:41:00 +0800 CST
其實Fairy Floss workshop並未有自家嘅實體鋪，反而係將貨品以拆帳形式寄賣喺唔同嘅地方，就好似小編今次嚟到採訪嘅，就係中環嘅元創方「PMQ」。PMQ位於中環鴨巴句街35號，間格係有啲似學校，咁係因為佢的確係由學校改建而成，大大話話都有成百幾年歷史。入到PMQ，感覺真係同一個商場差唔多，有形形色色嘅小鋪，樓上樓下，好多都係賣精品、服裝為主。喺門口仲有一個CAFÉ畀遊客攤抖吓，其實都幾輕鬆。
楼主
皇帝夢 发布于
2016-06-22 11:43:00 +0800 CST